Federata e Futbollit të Kosovës ka vendosur t’ia besojë stolin e ekipin A trajnerit Primoz Gliha. Slloveni rikthehet në stolin e Dardanëve pas shkarkimit të Alain Giresse.
“Komiteti Ekzekutiv i Federatës së Futbollit në Kosovë ka mbajtur sot mbledhjen e radhës, në të cilën është diskutuar për çështje të ndryshme me rëndësi për futbollin kosovar si dhe për ecurinë e përgatitjeve për edicionin e ri të garave.Në këtë mbledhje ndër çështjet kryesore që u diskutuan ishte zgjedhja e ekipit të trajnerëve që do ta drejtojnë Kombëtaren e Kosovës në ndeshjet e mbetura të ciklit kualifikues për Euro 2024. Kësisoj, pas diskutimeve të arsyeshme, KE i FFK-së vendosi që në krye të shtabit teknik të emërohet Primozh Gliha, derisa atij do t’i ndihmojnë Afrim Tovërlani, Arbnor Morina, Ahmet Beselica dhe Thomas Richards”, njofton FFK-ja.
Kujtojmë se Primoz Ghila ka ka drejtuar Kosovën në dy takime, duke marrë një humbje me Jordaninë (miqësore) dhe një barazim me Greqinë (1-1) më 14 nëntor 2021, për grupet e Botërorit, para se FFK t’ia besonte stolin Alain Giresse. 55-vjeçari në karrierën e tij ka drejtuar ekipe si Gorica, NS Mura, Koper, Sllovenia U-21 dhe Kosovën. Ndër emrat e përfolur për stolin e Kosovës ishte edhe legjenda e Ukrainës, Andry Shevchenko.
